تسريح الشعر

كلنا كبرنا واحنا متعودين نسرح شعرنا كل يوم لأن أمهاتنا كانت بتصمم على دة، وكانت بتشوف إن لو دة ما حصلش، شكلنا هيبقى منكوش ومبهدل!

عشان كدة انهاردة قررنا ندمر أسطورة جديدة ونجاوب على السؤال الأبدي “نسرح “ولا ما نسرحش؟

خلينا نقول انك كشخص بشعره الطبيعي، محتاج تسرح شعرك في أيام الغسيل بس. وده لأن الشعر الطبيعي بيبقى في أحسن حالاته لما تكون الكيرلز محددة، والتسريح كل يوم هيدمر الكيرلز دي بعد تصفيفها وتثبيتها.

سامعينكم بتسألوا “طيب أسرح شعري إزاي؟”. أولاً، ألطف طريقة للتعامل مع الشعر الطبيعي هي إنك ما تستخدمش فرشة خالص لتسليكه وتفك التشابك بصوابعك وشعرك مبلول ومليان بلسم.

لو كان شعرك متشابك جدًا وصوابعك لوحدها ما جابتش نتيجة، ممكن بعد كدة استخدام فرشاة لفك التشابك أو مشط واسع.

الفكرة إنك لو سلكت شعرك وهو ناشف، هيكون في تكسير وشد كتير ودة هيسبب كمان أطراف الشعر المقصفة. لازم تسرح شعرك بلطف جدًا بعد ما تحط عليه البلسم؛ البلسم هيسهل الموضوع وهتحتاج شد أقل عشان تفك تشابك شعرك، وبالتالي تكسر أقل.

بعد ما تخلص غسيل شعرك و يبقى متسلك كويس، ممكن تستخدم فرشاة تصفيف زي فرشاة التحديد بتاعتنا مع منتجات التصفيف بتاعتك عشان توزعها بالتساوي وتوصل لأقصى تحديد.

قولولنا في الكومنتات عن الطريقة اللي بتفضلوها لفك تشابك شعركم!

Leave a Reply