الفيتامينات

الأساطير اللي بتتكلم عن العناية بالنفس كتير جدًا وبتضايق فعلاً، ده غير إنها أغلب الوقت بتبقى غالية كمان، ومش بنلاقي منها النتائج المتوقعة، وعشان إحنا بنحب دايمًا نعرفكم الحقيقة، هنبدأ سلسلة من البوستس التعليمية عشان نسَلِّك الأساطير والمعلومات الغير حقيقية

“خد حبة الفيتامينات دي كل يوم وشعرك هيطول ويتقل جدًا في أسبوعين بس”

دي أول أسطورة هنقضي عليها، ودة لأنها مشهورة جدًا
أولاً، لازم نتفق أن بصيلات الشعر الصحية بتطول بمعدل 1-1.5 سم في الشهر، وأحيانًا أكتر شوية عند بعض الناس. بصيلات الشعر الصحية هي اللي الدورة الدموية فيها كويسة، واللي فيها كمية كافية من الفيتامينات والمعادن وكمان فيها توازن هرمون

في ناس شعرها بيطول بصعوبة أو بيقع بسبب نقص التغذية، وعادة ده بيتعالج عن طريق الفيتامينات لمدة 3 لــ 6 شهور


الفكرة أن، بغض النظر عن جودة ونوع الفيتامينات، عمرها ما هتطول الشعر بالسرعة دي. أحسن حاجة ممكن تحصل من الفيتامينات إنها ترجع بصيلات الشعر لحالتها الصحية وتطول الشعر بالمعدل العادي، 1-1.5 سم في الشهر. كمان لازم نفتكر أن مش مع أول حباية النتيجة هتبان في نفس اللحظة، الموضوع محتاج من شهر لــ ٣ شهور عشان يجيب نتيجة.

نقطة تانية مهمة هي أن مش كل حالات تساقط الشعر وبطء نمو الشعر مسألة نقص غذائي ممكن يتعالج بالفيتامينات، لأن التوتر والوراثة والاختلالات الهرمونية ممكن تسبب تساقط الشعر وتحتاج علاجات خاصة

المهم أنه أكيد ممكن نجرب الفيتامينات اللي مش بتحتاج وصفة طبية أول 3 شهور، ونقيم النتائج بتوقعات واقعية. لو نتائجك كانت غير مرضية والمشكلة استمرت، فلازم تستشير طبيب أمراض جلدية في أسرع وقت للوصول لسبب المشكلة وحلها

قولولنا عن تجاربكم مع الفيتامينات في التعليقات وقولولنا عن أساطير تانية عايزينا نقضي عليها

Leave a Reply