أطراف الشعر المقصفة

ما نقدرش ننكر أن الأطراف المقصفة هي العدو اللدود لتطويل الشعر بالنسبة لنا، كام مرة أخدتي قرار تطويل شعرك، وبعد كام شهر لقيتي الأطراف كلها مقصفة وحسيتي أن كل اللي عملتيه راح عالفاضي؟؟ 

وبعدين بتبدأي تدوري على علاج للأطراف المقصفة، وتلاقي منتجات كتير بتوعدك إنها تصلح الأطراف المقصفة، فهل دة ممكن؟

من الناحية الواقعية، الحل الوحيد لتقصف الأطراف هو قصها، وبعد القص لازم نحافظ على الشعر ونتعامل معاه بطريقة صحية عشان مايتقصفش تاني.  ودة معناه أن لازم نوقف الحرارة والمواد الكيميائية القاسية أو مواد فرد الشعر ودايمًا تحمي شعرك كويس قبل السباحة. بسيطة أوي صح؟

 أما بقى بالنسبة للمنتجات اللي بيتم الإعلان عنها إنها بتصلح الأطراف المقصفة، فدة معناه إنها غنية بالزيوت والزبدة اللي بتقفل الأطراف وتحسن شكلها، بس دة برضو مش حل عملي، لأننا لو سبنا الأطراف مقصفة من غير قص، التقصيف هيفضل يطلع لفوق في الشعرة، يعني لو كنت في الأول محتاجة تقصي ٢ سم من شعرك وماقصيتيهاش، بعد شوية وقت الكمية هتزيد وهتضطري تقصي أكتر، ودة عكس أهداف تطويل الشعر.

 لكل صاحبات الشعر الطبيعي، قولولنا في الكومنتات إزاي الاتجاه للشعر الطبيعي أنقذ أطرف شعركم !

Leave a Reply